ایک ملبوس دریدہ ہے مری وحشت ہجر

 ایک ملبوسِ دریدہ ہے مِری وحشتِ ہجر

ہوئی جاتی ہے حجابوں میں عیاں قامتِ ہجر

اک تحیر سا تحیر ہے طلسم گاہِ طلب

ہے فسوں خیز کہیں اس سے سوا عشرتِ ہجر

دامنِ درد میں سمٹا جو سکوتِ گریہ

چشمِ بے آب میں پوشیدہ رہی عصمتِ ہجر

تنگ دامانیٔ عالم میں سما ہی نہ سکی

ہے سریر آرا کراں تا بہ کراں وسعتِ ہجر

آئینہ خانۂ دل میں ہے وہی پرتوِ حزن

نقش در نقش وہی خال و خدِ شوکتِ ہجر

پردۂ چشم پہ رقصاں ہے تِرا عکس ہنوز

سو بس اک وہم ہے یہ کارگۂ ساعتِ ہجر

عشقِ شوریدہ تو عریاں ہوا جاتا تھا مگر

پردہ دارِ نگۂ شوق رہی کسوتِ ہجر

زخمِ دل دیدۂ خوننابہ فشاں جذب و جنوں

ساتھ لائی ہے خزینے خبرِ تہمتِ ہجر

اک تلاطم میں ہے یہ عالمِ آب و خاکی

ہائے مت پوچھیے انجم زبرِ حرمتِ ہجر

انجم عثمان