کر دیتے ہیں جو پیار میں غرقاب ترے خواب

 کر دیتے ہیں جو پیار میں غرقاب تِرے خواب

ہیں میرے لیے عشق کی محراب ترے خواب

یادوں کی حسیں رات میں مہتاب ترے خواب

ترسیلِ محبت کے سبھی باب ترے خواب

اب تجھ سے ملاقات کی صورت نہیں کوئی

ہیں میرے لیے جینے کے اسباب ترے خواب

جو بزم محبت کے ستاروں سے سجی ہے

اس بزمِ محبت کے ہیں آداب ترے خواب

جو ہجر کی راتوں میں بہے آنکھ سے آنسو

ان آنسوؤں میں ہو گئے غرقاب ترے خواب

صحرا میں بگولوں سے بھٹکتے ہیں خیالات

آنکھوں میں مِری ہو گئے گرداب ترے خواب

کیوں مجھ سے ہے ناراض خطا کیا ہوئی مجھ سے

کیوں میرے لیے ہو گئے کمیاب ترے خواب

تو جب سے مرے یار رقیبوں سے ملا ہے

آنکھوں میں مری ہو گئے تیزاب ترے خواب

جی بھر کے سراج اس نے مجھے دیکھا سرِ بزم

لگتا ہے کہ پھر ہو گئے شاداب ترے خواب

سراج الدین گلاؤٹھوی