شہروں کی فصیلوں پہ جب نام مِرا لکھنا
تفصیلِ سِتم دینا، پھر اپنا پتا لکھنا
یہ ظرفِ محبت ہے، معراج شرافت کی
جو قطرۂ خُوں نکلے قاتل کو دُعا لکھنا
اس شہر کے لوگوں کا انداز نہیں مِلتا
مٹی میں اثر کیا ہے کیسی ہے ہوا لکھنا
رہتا ہے بہر صورت احساس فنا دل میں
مُشکل ہے بہت مُشکل بندے کو خُدا لکھنا
انسان ہوں فرشتوں کے اوصاف نہیں مجھ میں
اک جبر ہے دُشمن کے بچوں کو دُعا لکھنا
ہر منظر نادیدہ خُود شعر میں ڈھلتا ہے
جذبات کی یورش میں کیا سوچنا کیا لکھنا
بے داغ ہے اختر کے کردار کا آئینہ
یہ رسم ہے دُنیا کی اچھوں کو بُرا لکھنا
اختر عظیم آبادی
No comments:
Post a Comment