ٹمٹماتے تھے ستارے چاند بھی ڈوبا نہ تھا

 ٹمٹماتے تھے ستارے چاند بھی ڈوبا نہ تھا

اک دریچہ بھی کھلا تھا اور میں سویا نہ تھا

رات اپنا بھی ہوا رِندوں کی محفل سے گزر

پی رہے تھے شیخ صاحب دور بھی پہلا نہ تھا

غمزہ و ناز و ادا کی یوں لگی تھی بِھیڑ سی

حسن والے تھے بہت لیکن کوئی تجھ سا نہ تھا

بلبلیں تھیں پھول تھے جوبن پہ تھا رنگ بہار

پر کہیں بھی چاند سا چہرہ نظر آتا نہ تھا

ہو گئے ہم اک نظر میں تیرے عشووں کا شکار

اور ابھی پہلی محبت کا نشہ اترا نہ تھا

آئینہ دیکھو تو آ جائے تمہیں شاید یقیں

تیری آنکھوں میں سوا میرے کوئی چہرہ نہ تھا

اجنبی سی زندگی بے ذائقہ سی موت ہے

میں نہ تھا شاہد کسی کا اور کوئی میرا نہ تھا

شاہد رضوان چاند

شاہد رضوان مہوٹہ