تجھ سے مل کر اس قدر اپنوں سے بیگانے ہوئے

 تجھ سے مل کر اس قدر اپنوں سے بیگانے ہوئے

اب تو پہچانے نہیں جاتے ہیں پہچانے ہوئے

بت جنہیں ہم نے تراشا اور خدائی سونپ دی

آ گئے ہیں سامنے پتھر وہی تانے ہوئے

خلق کی تہمت سے چھوٹے سنگ طفلاں سے بچے

خوب تھے وہ لوگ جو خود اپنے دیوانے ہوئے

اس کو کیا کہیے کہ ہم ہر حال میں جلتے رہے

دوریوں میں چاند تھے قربت میں پروانے ہوئے

اپنی صورت میں بھی خاطر ایک گونہ سحر تھا

آئینہ خانوں میں فرزانے بھی دیوانے ہوئے

خاطر غزنوی