جس سے دل مانوس تھا اچھا بھلا ملتا نہیں

 وردِ طلب

جس سے دل مانوس تھا اچھا بھلا ملتا نہیں

نازنیں تیری عماری کا پتہ ملتا نہیں

فاصلے سب بیچ کے

فاصلے سب بیچ کے

دو ہیں دنیائیں جو دیکھو 

پہلے آنکھیں کھول کے پھر میچ کے

اک طرف کالی گھٹا

اک طرف کالی گھٹا

اک طرف رقصاں شجر جھکڑ میں تھرّاتا ہوا

دور کوئی مست زلفِ شاخ لہراتی ہے 

ہاتھوں کو سِرا ملتا نہیں

نازنیں تیری عماری کا پتہ ملتا نہیں

نقش ہے یا ہے سحاب

نقش ہے یا ہے سحاب

دھول ہے یا روغنِ سطحِ دو باب

یہ گھنیرا خارزار

یہ گھنیرا خارزار

اس پہ چلیے پابرہنہ بار بار

راہرو کو گام بھر کا راستہ ملتا نہیں

نازنیں تیری عماری کا پتہ ملتا نہیں

یوں بھٹکتے جائیے

یوں بھٹکتے جائیے

پردۂ خالی پہ حیرانی سے تکتے جائیے

یہ نظارہ کیا ہوا

یہ نظارہ کیا ہوا

وہ ابھی کا آنکھ دیکھا نظم نقشہ کیا ہوا

طائروں کو انجمِ منزل نما ملتا نہیں

نازنیں تیری عماری کا پتہ ملتا نہیں

چیدہ چیدہ کچھ بتا

چیدہ چیدہ کچھ بتا

چلتے چلتے اے طلب کے راہ دیدہ کچھ بتا

کیا تعاقب کیا سراغ

کیا تعاقب کیا سراغ

کب ملے گا الجھنوں کی کاو کاوی سے فراغ

پانے والوں کو ملا کیا مجھ کو کیا ملتا نہیں

نازنیں تیری عماری کا پتہ ملتا نہیں

اسد فاطمی