حال دل کس کو سنائیں آپ کے ہوتے ہوئے

 عارفانہ کلام حمد نعت منقبت

حالِ دل کس کو سنائیں آپﷺ کے ہوتے ہوئے

اور دَر پہ کس کے جائیں آپﷺ کے ہوتے ہوئے

میں غلام مصطفٰیﷺ ہوں یہ مِری پہچان ہے

غم مجھے کیوں کر ستائیں آپﷺ کے ہوتے ہوئے

شانِ محبوبی دکھائی جائے گی محشر کے دن

کون دیکھے گا خطائیں آپﷺ کے ہوتے ہوئے

زلفِ محبوب خدا لہرائے گی محشر کے دن

خوب یہ کس کی گھٹائیں آپﷺ کے ہوتے ہوئے

میں یہ کیسے مان جاؤں شام کے بازار میں

چھین لے کوئی ردائیں آپﷺ کے ہوتے ہوئے

اپنا جینا اپنا مرنا اب اسی چوکھٹ پہ ہے

ہم کہاں سرکار جائیں آپﷺ کے ہوتے ہوئے

کہہ رہا ہے آپ کا رب اَنتَ فِیھِم آپﷺ سے

میں انہیں دوں کیوں سزائیں آپﷺ کے ہوتے ہوئے

یہ تو ہو سکتا نہیں ہے یہ بات ممکن ہی نہیں

میرے گھر میں غم آ جائیں آپﷺ کے ہوتے ہوئے

کون ہے الطاف اپنا حال دل کس سے کہیں

زخم دل کس کو دکھائیں آپﷺ کے ہوتے ہوئے

میرے تو سب کچھ ہی آقاﷺ آپ ہیں صرف آپ ہیں

اور لو کس سے لگاؤں آپﷺ کے ہوتے ہوئے

میرے دکھ کو اور کوئی چارہ گر سمجھے گا کیا

زخمِ دل کس کو دکھاؤں آپﷺ کے ہوتے ہوئے

میں کسی حاتم کے آگے اک سوالی کی طرح

ہاتھ کیوں پھیلانے جاؤں آپﷺ کے ہوتے ہوئے

میرے تو دکھ درد کے واحد مسیحا آپ ہیں

اور میں کس کو بلاؤں آپﷺ کے ہوتے ہوئے

میں بہت شرمندہ ہوں اپنے گناہوں پر مگر

یہ حقیقت کیوں چھپاؤں آپﷺ کے ہوتے ہوئے

جو ستم مجھ پر ہوئے ہیں وقت کے ہاتھوں حضورﷺ

اور میں کس کو بتاؤں آپﷺ کے ہوتے ہوئے

میرے لہجے کی تڑپ کو اور پہچانے گا کون

نعت کس کو جا سناؤں آپﷺ کے ہوتے ہوئے

آپ کا اقبال میرے ساتھ ہے تو فکر کیا

رنجِ محشر کیوں اٹھاؤں آپﷺ کے ہوتے ہوئے

اقبال عظیم