چہرے سے آدمی کے عیاں کچھ نہ کچھ تو ہے

 چہرے سے آدمی کے عیاں کچھ نہ کچھ تو ہے

اس کارگاہِ شر میں نہاں کچھ نہ کچھ تو ہے

بوڑھے شجر میں اب بھی مقیّد ہے ایک روح

گم کردہ منزلوں کا نشاں کچھ نہ کچھ تو ہے

بے جا بھٹک رہی ہیں نگاہیں اِدھر اُدھر

اب بھی پسِِ غبار رواں کچھ نہ کچھ تو ہے

ہم جو ڈرے سے ہیں اپنے ہی آپ سے

سر گرم فکرِ سُود و زیاں کچھ نہ کچھ تو ہے

افلاک پر ہے طائرِ بے بال و پر ہنوز

ہنگامِ چِیرہ دستئ جاں کچھ نہ کچھ تو ہے

جاری ہے اب بھی نقل مکانی کا سلسلہ

وجہِ رموزِ کون و مکاں کچھ نہ کچھ تو ہے

کچھ اختلاف باعثِ تخلیق ہوتے ہیں

انعامِ چشمکِ گزراں کچھ نہ کچھ تو ہے

زندہ مجھے کرے گا اچانک تِرا خیال

صحرا میں شرحِ وہم و گماں کچھ نہ کچھ تو ہے

شاداب! اپنے بارے میں کچھ سوچتا نہیں

درکار پھر بھی کارِ جہاں کچھ نہ کچھ تو ہے

شاداب احسانی