من تُو شُدم
میں تمہیں جانتی ہوں
مجھے معلوم ہے
تم کب سے تنہائی کے نشانے پر ہو
تم اس کی عادی بن چکی تھی
تم نے زندگی کو
موت کے دائرے میں گُھومتا دیکھ لیا تھا
تم نے دُکھوں کی پوٹلی کھولی
سارے غم
زندگی کی اندھی سُرنگ میں پھینک دئیے
اس سے پہلے تم نے
دوستی کے دعوؤں کا سارا زہر پی لیا
تمہاری مروت تمہارا مقدر نہ بنی
تم نے بالآخر
اس ریشمی ڈوری کو بھی آگ لگا دی
جسے سنبھالتے سنبھالتے تم اپنے ہاتھ اور آنکھیں
زخمی کر چکی تھی
تم نے امید، خواب اور تعبیر کو
دریچوں سے جھانک کر
پلٹتے دیکھا اور
دھیرے سے
اپنی آنکھ میں چھپا
آخری خواب بھی
خلا میں گھومتے چرخ پر لٹکا دیا
خواب کی سسکی
اس اندھے چاک کی سیٹی میں گم ہو گئی
مجھے پتہ ہے
تم اس سے پہلے ہی
سارے قرض اُتار چکی تھی
تم نے آزادی حاصل کر لی
اب تمہیں ٹُوٹنے بکھرنے سے ڈر نہیں لگتا
تم نے شانتی کی اجرک پہن لی ہے
مگر کس قیمت پر؟
کوئی نہیں جانتا
فقط میں جانتی ہوں کہ
من تن شُدم تُو جاں شُدی
قناعت کے بطن میں چُھپی طلب مرتی نہیں
مدیحہ مغل
No comments:
Post a Comment