ویسے تو ترے حسن کے میخوار بہت ہیں

 ویسے تو تِرے حسن کے میخوار بہت ہیں

پر مجھ سے کہاں صاحبِ اسرار بہت ہیں

ہر عشق تو اب اتنا مفصل نہیں ہوتا

بس میرے فسانے میں ہی کردار بہت ہیں

دریا بھی سمندر بھی ہیں اس عالمِ غم میں

جیسا کہ یہاں جنگل و کہسار بہت ہیں

پہلے تو تِرے نام سے واقف نہ تھی دنیا

"سنتے ہیں تِرے آج خریدار بہت ہیں"

ہر سمت تِرے حسن کا شہرہ ہے جہاں میں

ہر سمت تِرے نام کے دلدار بہت ہیں

کیا میری رقابت بھی فضیلت ہے بتاؤ

عشّاق مجھے درپئے آزار بہت ہیں

اک غم ہے زمانے میں مجھے غم کا نہ ہونا

اک غم ہے کہ بے غم کے بھی غمخوار بہت ہیں

اسعد کی محبت میں کمی ہے تو کہاں پر

ظالم پہ سعادت کے تو آثار بہت ہیں

اسعد لاہوری