میری قسمت میں بھی ایسا کوئی سجدہ کر دے
جو مِرے سارے گناہوں کا مداوا کر دے
ساری دنیا سے چُھڑا کر مجھے اپنا کر دے
میری مٹی کو خدایا مِرا سونا کردے
میں تیرا چاہنے والا ہوں مگر ہے حسرت
جن کو تُو چاہتا ہے مجھ کو بھی ویسا کر دے
اک نظر اپنے گنہ گار پہ کر کے مولا
اپنی رحمت کا سزاوار ہمیشہ کر دے
جس طرف جائے نظر تیرے ہی جلوے دیکھوں
شوقِ اُلفت کو مِرے حد سے زیادہ کر دے
ہر گھڑی تیری ثنا خوانی میں گزرے میری
حمدِ باری میری بخشش کا حوالہ کر دے
حمد کہنے کا مجھے ایسا سلیقہ دے دے
جو فرشتوں میں میرے ذکر کا چرچا کر دے
تیرا بندہ ہوں خطاکار و سیہ کار سہی
بوجھ سر پر جو بلاؤں کا ہے ہلکا کر دے
میں گنہ گار، طلب گار تیری رحمت کا
میری خواہش ہے مجھے دشت سے دریا کر دے
میں غرض جتنا جیوں تیرا ہی بندہ بن کر
ہے میری عرضِ تمنا اسے پورا کر دے
ابرار ندیم
No comments:
Post a Comment