سکون دل کدھر بیٹھا ہے تنہا

 سکونِ دل کدھر بیٹھا ہے تنہا

پرندہ شاخ پر بیٹھا ہے تنہا

ہجومِ شہر میں صد کرّ و فر سے

وہ بیٹھا ہے مگر بیٹھا ہے تنہا

کسی کی چاندنی میں شاہزادہ

سراپا تر بہ تر بیٹھا ہے تنہا

فیوضِ کاسۂ زینت کا صدقہ

گلی میں تاجور بیٹھا ہے تنہا

نگاہوں میں لیے انبارِ عرضی

تہی فن بے ہنر بیٹھا ہے تنہا

تِری مرضی ہے جاں لے لے کہ چھوڑے

مبارِز بے سپر بیٹھا ہے تنہا

تخیّل میں تجلّی کر مکمّل

مِرا شعری سفر بیٹھا ہے تنہا

ستارے پردۂ ظلمت میں گُم ہیں

مِرے دل پر قمر بیٹھا ہے تنہا

کوئی آئے لگائے نرخِ بالا

سمندر میں گُہر بیٹھا ہے تنہا

کہاں ہے لمسِ دستِ برف آسا

اسد ذوقِ کمر بیٹھا ہے تنہا

اسد اللہ قادری