رہے گی ناخن فرقت کی کب تک سینہ افگاری

 عارفانہ کلام حمد نعت منقبت

رہے گی ناخنِ فرقت کی کب تک سینہ افگاری

کرے گی یاس تا کے زخم پر دل کے نمک باری

بہیں گے دل کے ٹکڑے بن کے آنسو آنکھ سے کب تک

رہیں گے چشمِ پُر ارماں سے کب تک اشکِ غم جاری

نہ کچھ حُسنِ عمل ہی ہے نہ کوئی مادی ساماں

جو کچھ ساماں ہے تو چھوٹی سی تھوڑی گریہ و زاری

میں کس منہ سے کہوں مجھ کو بلا لیجے مدینہ میں

میں خود نادم ہوں آقاﷺ دیکھ کر اپنی سیاہ کاری

ولیکن کیا تعجب ہے اگر اپنی کریمی سے

کرے وہ رحمتِ عالمﷺ خطاکاروں کی ستاری

ذرا بھی چشمِ رحمت ہو تو مٹ جائیں گُنہ میرے

مرادیں سب بر آئیں نکلیں دل کی حسرتیں ساری

وہ الطافِ کریمانہ ہوں، وہ انعامِ شاہانہ

نعیم الدیں کو دیکھیں دیدۂ حسرت سے درباری

نعیم الدین مرادآبادی