ماں آگ ہے، پانی ہے نہ مٹی نہ ہوا ہے

 ماں جی کے لیے نظم

ماں آگ ہے، پانی ہے نہ مٹی نہ ہوا ہے

ماں نور کی تاثیر ہے، احساسِ خدا ہے

ماں سلسلۂ خلق ہے، عرفاں کا تقدس

ماں سارے زمیں زاد نصابوں سے ورا ہے

ماں گہرے جگر سوز مسائل میں کماں ہے

ماں پیر ہے، محبوب ہے، اللہ کی رضا ہے

ماں ہی نے سنبھالے ہیں یہ جنّت کے مہاجر

ماں ہی سے یہ تہذیب ہے، رشتے ہیں، وفا ہے

ماں حیرتِ اہرامِ کُہن، سطوتِ نقشِ اقصیٰ

ماں قوت اظہار ہے، جرأت ہے، جزا ہے

ماں اسمِ علیؑ، جسمِ علیؑ، رازِ محبت

ماں حیدرِ کرارؑ ہے، ولیوں کی وفا ہے

ماں چادرِ تطہیرؑ ہے، رحمت ہے، دعا ہے

ماں ہی کا تو بیٹا ہے جو محبوبِؐ خدا ہے

نجم الحسنین حیدر