وصالِ مرگ ہُوا یا وصالِ یار ہُوا
غرض طوالتِ فرقت کا اختصار ہوا
ہوا امتحاں ذرا اے نگاہِ صبر شکن
کسے قرار ہوا؟ کون بے قرار ہوا؟
خیالِ عارضِ گلگوں میں گل کھٹکتے ہیں
نگاہِ یاس میں گلزار، خارزار ہوا
وفائے گل کا سمجھنا بھی اک قیامت ہے
صدائے صور ہمیں نغمۂ ہزار ہوا
کھلا تو کھلتے ہی رخصت ہوئی بہار چمن
شگوفہ گل نہ ہوا، شعلۂ شرار ہوا
مثال ہو گئی زندہ فنائے عالم کی
میں بے نشان زمانے میں یادگار ہوا
مقامِ عبرتِ اہلِ جہاں ہے اے شائق
کہ قبلہ گاہِ غریباں مِرا مزار ہوا
پنڈت شائق وارثی
No comments:
Post a Comment