کوئی تو بات کرے التجا قبول کرے

 کوئی تو بات کرے التجا قبول کرے

اسے کہو کہ مِرا فیصلہ قبول کرے

میں چاہتا ہوں مِرے عشق میں الگ ہو کچھ

میں بیوفائی کروں وہ وفا قبول کرے

دعائیں مانگتے رہئیے حریف لمحوں میں

نہ جانے کب وہ ہماری دعا قبول کرے

وبا سے جان اگر بچ گئی تو مل لیں گے

اسے کہو کے ابھی دیکھنا قبول کرے

تمہارے لمس کا عادی ہے ایک مدت سے

یہ درد کیسے کسی کی دوا قبول کرے

قریب رہ کے اتر جائے گا نگاہوں سے

تو لازمی ہے ذرا فاصلہ قبول کرے

ہزار کہیے ردیفیں نئی نئی لیکن

ردیف وہ ہے جسے قافیہ قبول کرے

خموش لہروں کے دامن میں تیز طوفاں ہیں

خدا کرے کے مِرا نا خدا قبول کرے

نیا سنانے کا تب ہی مزہ ہے اے واحد

کہ تیری بات نیا قافلہ قبول کرے

رمیز واحد میرٹھی