میں غلام عجمی آپ ہیں سلطان عرب

 عارفانہ کلام حمد نعت منقبت

میں غلامِ عجمی آپﷺ ہیں سلطانِ عرب

مجھ کو مل جائے کوئی غنچۂ بستانِ عرب

حجرۂ کن میں اندھیرے کا کہیں نام نہیں

روشنی دیتے ہیں کچھ ایسی چراغانِ عرب

باغِ فردوس ہوئے گوش بر آواز اس دم

چھڑ گیا جب بھی کہیں ذکرِ بیابانِ عرب

جس طرف آنکھ اٹھی منظرِ صد رنگ ملا

خالی رکھا نہ مِرے شاہ نے دامانِ عرب

شان رکھتا ہے عجب تیرا بلالِ حبشی

سر نگوں اس کے مقابل ہیں حسینانِ عرب

نارسائی پہ مِری چشمِ کرم ہو آقاﷺ

ایک مدت سے نہاں دل میں ہے ارمانِ عرب

میرے اُمی لقبیﷺ یہ تِرا اعجازِ بیاں

سارے انگشت بدنداں ہیں فصیحانِ عرب

قصرِ شاہی کا تصور بھی ہے جرم ان کے لیے

مطمئن رہتے ہیں کیا خاک نشینانِ عرب

آج تک دیتی ہے تاریخ سلامی ان کو

اللہ اللہ رے مردان و جوانانِ عرب

جس کے جلووں کو ترستی ہیں ہماری آنکھیں

اس کے جلووں کی تماشائی ہیں چشمانِ عرب

نعت گوئی میں ودیعت ہو اگر طرزِ رضا

جب تو فاضل بھی بنے گا سگِ حسانِ عرب

فاضل میسوری