نعت حبیب کہئے کہ حمد خدا بھی ہے

 عارفانہ کلام حمد نعت منقبت

نعتِ حبیبﷺ کہیے کہ حمدِ خدا بھی ہے

توصیف مصطفیٰﷺ کی، خدا کی ثناء بھی ہے

تُو اصلِ کُنْ ہے، حاصلِ ہر مُدعا بھی ہے

اے مبتدائے خلق، تُو ہی منتہا بھی ہے

سر تا پا تُو بشر ہے، بشر سے سوا بھی ہے

یعنی، تمام مظہرِ عینِ خدا بھی ہے

ہر ٹیسں میں سکوں ہے تڑپ میں مزا بھی ہے

دردِ فراقِ ماہِ مدینہ دوا بھی ہے

کعبہ میں ہوں جبیں پئے سجدہ ہے بیقرار

شاید مِرے نبیﷺ کا یہیں نقشِ پا بھی ہے

ایمان کی تو یہ ہے کہ پا کر درِ حضورﷺ

جو ہوش میں نہ ہو اسے سجدہ روا بھی ہے

اے اہلِ عرش! خاک نشیں ہم سہی مگر

یہ فرشِ خاک مسندِ شاہِ دنیٰﷺ بھی ہے

مکہ کی شب میں صبحِ مدینہ ہے جلوہ گر

کیا حُسن عارضِ پسِ زلفِ دو تا بھی ہے

کچھ بھی سہی حضورﷺ مگر ہے تو آپ کا

اختر گناہ گار بھی، بَد بھی، بُرا بھی ہے

سید محمد مرغوب

اخترالحامدی الرضوی