اڑیں گی تا کجا چھینٹیں لہو کی تیغِ قاتل سے
کہاں تک اب زمیں رنگین ہو گی خونِ بسمل سے
کہاں تک بجلیاں گرتی رہیں گی آشیانوں پر
کہاں تک حشر اٹھے گا نوحۂ شورِ عنادل سے
کہاں تک نا خدا ہمت کرے گا موجِ طوفاں سے
کہاں تک غرق ہوں گی کشتیاں ٹکرا کے ساحل سے
کہاں تک قیس کے نالے نہ ممنونِ اثر ہوں گے
کہاں تک اب نہ لیلیٰ جھانک کر دیکھے گی محمل سے
کہاں تک طالبانِ حق رہیں گے قید خانوں میں
کہاں تک عقل جکڑی جائے گی بندِ سلاسل سے
کہاں تک اور قسمت میں ابھی ہیں ٹھوکریں کھانی
کہاں تک کارواں بھٹکا پھرے گا اپنی منزل سے
کہاں تک اب رہے گا سلسلہ دورِ حوادث کا
کہاں تک مشکلوں کی چارہ سازی ہو گی مشکل سے
کہاں تک اب زباں کٹتی رہے گی شکوۂ غم پر
کہاں تک جوشِ بے تابی میں نکلے کی دعا دل سے
کہاں تک اب نہ احساسِ تمیزِ نیک و بد ہو گا
کہاں تک ہمسری ذرے کریں گے ماہِ کامل سے
کہاں تک دوستی کا نام لے کر دشمنی ہو گی
کہاں تک ایک دل دھوکا کرے گا دوسرے دل سے
کہاں تک رہنمائی رہزنی سے ساز رکھے گی
کہاں تک ہو گا محفل میں اندھیرا شمعِ محفل سے
رہے گا اور کب تک آئینہ خانے کا نظارہ؟
چلیں گی تا کجا چوٹیں مقابل کی مقابل سے
علامہ سریر کابری
No comments:
Post a Comment