وہی سفر جو پس کارواں نہیں ہوتا

 وہی سفر جو پسِ کارواں نہیں ہوتا

مِرا سفر ہے کبھی رائیگاں نہیں ہوتا

میں چاہتا ہوں کہ ارمان دسترس میں رہیں

مجھے پتا ہے کہ بام آسماں نہیں ہوتا

ہزار چیخوں میں سُنتا ہوں اس کی خاموشی

کوئی بھی زخم کبھی بے زباں نہیں ہوتا

اگر وہ دریا تِرے شہر سے گُزرتا نہیں

رواں تو ہوتا، پر اتنا رواں نہیں ہوتا

میں ایسے جلتا ہوں جیسے کہ بُجھ رہا ہو کوئی

تُو ایسی آگ ہے جس کا دُھواں نہیں ہوتا

امیت بجاج

امت بجاج