عارفانہ کلام حمد نعت منقبت
الٰہی اذن سفر دے مِرے سفینے کو
زمانہ ہو گیا دیکھے ہوئے مدینے کو
پھر آج کل مِرے جذبات سرد ہیں یا رب
تپا دے سوزِ محبت سے میرے سینے کو
ہے آرزو کے دیارِ رسولﷺ میں جا کر
میں سیکھ جاؤں محبت کے ہر قرینے کو
طوافِ کعبہ بصد شکر و احترام کروں
نصیب ہو مجھے آبِ طہور پینے سے
میں ان ہواؤں میں جاؤں کہ جن ہواؤں نے
کیا ہے جذب بہار آفریں پسینے کو
وہ موجِ نور عطا ہو درِ رسالتؐ سے
جلا جو کر دے میرے دل کے آبگینے کو
میں بارگاہِ رسالتؐ میں جا کے نذر کروں
محبتوں کے تراشے ہوئے نگینے کو
جہاں سے شمعِ رسالتؐ کی روشنی پھیلی
ترس رہا ہے اثر اس فضا میں جینے کو
ابوبکر اثر انصاری
No comments:
Post a Comment