بن مِرا ہمسفر سوچ کر دیکھ کر
ساتھ دے پر مِری رہگزر دیکھ کر
اپنا ماضی بہت یاد آیا مجھے
سبز پتہ کوئی شاخ پر دیکھ کر
میں نے بھی چار دن زندگی کی تو تھی
یاد آیا مجھے ایک گھر دیکھ کر
چاندنی رات پھر چاندنی رات ہے
بے مزہ ہو گیا ہوں سحر دیکھ کر
عشق پر میرا ایمان پختہ ہوا
اپنی جانب کسی کی نظر دیکھ کر
دوست مجھ کو کوئی ایسی جلدی نہیں
چل رہا ہوں میں اپنا سفر دیکھ کر
کنور امتیاز احمد
No comments:
Post a Comment