یوں بھی زبان حال سے فرمان نعت ہے

 عارفانہ کلام حمد نعت منقبت

یُوں بھی زبانِ حال سے فرمانِ نعت ہے

ذیشانِ دو جہاں ہے جو ذیشانِ نعت ہے

ارضِ حجاز، ارضِ درود و سلام بھی

عَرفاتِ نعت ہے، کہیں فارانِ نعت ہے

حیراں ہُوں بُو تُراب کے بابا کو پڑھ کے میں

دیوانِ شاعری ہے یا قرآنِ نعت ہے

پیشِ نظر ہو سُنتِ سرکارﷺ ہر جگہ

"ہر شعبۂ حیات میں امکانِ نعت ہے"

 کوئی سکھا رہا ہے ہمیں نعت کے ادب

یہ غارِ ثور ہے کہ دبستانِ نعت ہے

اصحاب کی ثنا سے بڑھے نعت کا وقار

آلِؑ نبیؐ کی مدح و صِفت جانِ نعت ہے

رشکِ بُخارا، رشکِ سمرقند سر زمین

یہ سر زمینِ ٭چھچھ بھی گلستانِ نعت ہے

جب جب نسیمِ نعت چلے، دل مچل اُٹھے

جیسے یہ دل نہیں گُلِ ریحانِ نعت ہے

مجھ پر تِری حدیث کے جوہر نہیں کُھلے

کس منہ سے میں کہوں مجھے عرفانِ نعت ہے

فائق ترابی

٭ چچھ یا چھچھ: شمال مغربی پنجاب کے ضلع اٹک کا شمالی علاقہ