اب دل میں تری یاد اتر آتی ہے جیسے

 اب دل میں تِری یاد اتر آتی ہے جیسے

پردیس میں غمناک خبر آتی ہے جیسے

آتی ہے تِرے بعد خوشی بھی تو کچھ ایسے

اجڑے ہوے پیڑوں پہ سحر آتی ہے جیسے

لگتا ہے ابھی دل نے تعلق نہیں توڑا

یہ آنکھ تِرے نام پہ بھر آتی ہے جیسے

خود آپ ہوا روز اٹھاتی ہے جنازے

اور آپ کہیں دفن بھی کر آتی ہے جیسے

اک قافلۂ ہجر گزرتا ہے نظر سے

اور رُوح تلک گرد سفر آتی ہے جیسے

جلتا ہے کوئی شہر کہیں دامن دل میں

سانسوں میں کبھی راکھ اتر آتی ہے جیسے

علی اکبر منصور