یوں نہ مل مجھ سے خفا ہو جيسے

يوں نہ مِل مجھ سے خفا ہو جيسے
ساتھ چل موجِ صبا ہو جيسے
لوگ يوں ديكھ كر ہنس ديتے ہيں
تُو مجھے بھول گيا ہو جيسے
موت بھی آئی تو اس ناز كے ساتھ
مجھ پہ احسان كيا ہو جيسے

کسی بھی حادثے سے زندگی کے ہم نہیں ڈرتے

 کسی بھی حادثے سے زندگی کے ہم نہیں ڈرتے

کسی بھی حال میں ہم حوصلہ کچھ کم نہیں کرتے

ہم آنے والے کل کے واسطے بے چین رہتے ہیں

جو کل گزرا ہے اس کل کا کبھی ماتم نہیں کرتے

ہماری ذات سے تکلیف پہنچے کوئی نا ممکن

کوئی ناحق اگر روٹھے تو اس کا غم نہیں کرتے

ہمنشیں پوچھ نہ مجھ سے کہ محبت کیا ہے

ہمنشیں پوچھ نہ مجھ سے کہ، محبت کیا ہے
اشک آنکھوں میں ابل آتے ہیں اس نام کے ساتھ
تجھ کو تشریحِ محبت کا پڑا ہے دورہ
پھر رہا ہے مِرا سر گردشِ ایام کے ساتھ
سن! کہ نغموں میں ہے محلول یتیموں کی فغاں
قہقہے گونج رہے ہیں یہاں، کہرام کے ساتھ

سب کو ادراک زیاں گر کے سنبھلنے سے ہوا

سب کو ادراکِ زیاں گر کے سنبھلنے سے ہوا
مجھ کو احساس تِرے دَر سے نکلنے سے ہوا
کوئی زنجیر کا حلقہ نہیں دیتا جھنکار
حال زنداں کا یہ اک میرے نکلنے سے ہوا
کوئی رازِ دلِ کہسار نہ کھلنے پایا
روز اعلان تو چشموں کے ابلنے سے ہوا

وفا کا عہد تھا دل کو سنبھالنے کے لئے

وفا کا عہد تھا دل کو سنبھالنے کے لیے
وہ ہنس پڑے مجھے مشکل میں ڈالنے کے لیے
بندھا ہوا ہے بہاروں کا اب وہیں تانتا
جہاں رُکا تھا میں کانٹے نکالنے کے لیے
کوئی نسیم کا نغمہ، کوئی شمیم کا راگ
فضا کو امن کے قالب میں ڈھالنے کے لیے

نظر فریب قضا کھا گئی تو کیا ہو گا

نظر فریبِ قضا کھا گئی تو کیا ہو گا
حیات موت سے ٹکرا گئی تو کیا ہو گا
نئی سحر کے بہت لوگ منتظر ہیں مگر
نئی سحر بھی کجلا گئی تو کیا ہو گا
نہ رہنماؤں کی مجلس میں لے چلو مجھے
میں بے ادب ہوں، ہنسی آ گئی تو کیا ہو گا

انساں نہیں رہتا ہے تو ہوتا نہیں غم بھی​

انساں نہیں رہتا ہے تو ہوتا نہیں غم بھی​
سو جائیں گے اک روز زمیں اوڑھ کے ہم بھی​
بے جا نہیں کہہ دوں جو اسے لطف و کرم بھی​
قسمت میں مِری اتنے کہاں تھے تِرے غم بھی​
جس لغزش آدمؑ سے خلافت ہے مزین​
اس جوشِ محبت کے خطاوار ہیں ہم بھی​