مری متاع بس یہی جادو ہے عشق کا

 مِری متاع بس یہی جادو ہے عشق کا

سیکھا ہے جس کو میں نے بڑی مشکلوں کے ساتھ

لیکن یہ سحرِ عشق کا تحفہ عجیب ہے

کھلتا نہیں ہے کچھ کہ حقیقت میں کیا ہے یہ

تقدیر کی عطا ہے کہ کوئی سزا ہے یہ

کس سے کہیں اے جان کہ یہ قصہ عجیب ہے

کہنے کو یوں تو عشق کا جادو ہے میرے پاس

پر میرے دل کے واسطے اتنا ہے اس کا بوجھ

سینے سے اک پہاڑ سا ہٹتا نہیں ہے یہ

لیکن اثر کے باب میں ہلکا ہے اس قدر

تجھ پہ اگر چلاؤں تو چلتا نہیں ہے یہ

امجد اسلام امجد