آتما تھک چکی ہے

 آتما تھک چکی ہے

بہت تھک چکا ہوں

یہی خود کو لکھنا اذیت کا سہنا

محبت کی نظمیں مکمل نہ ہونی

ہوا کا کوئی بھید مجھ پر نہ کھُلنا

میں کیا کر رہا ہوں

خبر بھی نہیں ہے کسے لکھ رہا ہوں

بہت تھک چکا ہوں

وہی جھیل اور جھیل کا اِک کنارا

وہ قصہ ہمارا

وہی نامکمل کہانی بھلائے نہ بھولے

وہی چند پتھر، لرزتے ہوئے عکس

وہی جھیل کا رقص

وہی کیفیت تنگ ہونے لگا ہوں

بہت تھک چکا ہوں

بدن میں تھکاوٹ نہیں پر مِری آتما تھک چکی ہے

مسافت بھی جیسے بہت بڑھ چکی ہے

تذبذب ہے سکتہ ہے سانسوں کی لے ٹوٹتی جا رہی ہے

کوئی ساتھ ہے چھوٹتا جا رہا ہے

مِرے ہاتھ پاؤں بھی شل ہو رہے ہیں

میں پانی میں اب ڈوبتا جا رہا ہوں

بہت تھک چکا ہوں

 ندیم بھابھہ