شورشِ دل یہیں پہلو میں دبایا میں نے
دل کے ہر لخت کو ہر رات جلایا میں نے
آج ہر زخمِ تمنا ہوا تازہ پھر سے
ہجر کی تیرگی کو آپ منایا میں نے
جس کے دَم سے مِرے ہونٹوں پہ تبسم بکھرا
پَل وہ بیتے ہوئے ماضی کا چُرایا میں نے
اس نئے دور میں ہے روح پرانی میری
سو لگا دل نہ یہاں، لاکھ لگایا میں نے
سانس لینے کیلئے خوابوں کو گِروی رکھا
اور گِن گِن کے یہی قرض چُکایا میں نے
گردشِ دہر کی درپیش مسافت کاٹی
یوں مَہ و مہر کا بھی بوجھ اٹھایا میں نے
میرے پلّو کی گِرہ میں ہے محبت بندھی
اب تلک اک یہی سرمایہ کمایا میں نے
یوں مسیحائی سے یہ زندگی کاٹی اپنی
درد بڑھتے ہی گلے خود کو لگایا میں نے
آرزو شاخوں نے بھی روک لیں سانسیں اپنی
دُکھ ابھی پہلا خزاؤں کا سنایا میں نے
اسماء آرزو
No comments:
Post a Comment