نہ لذت عشق و عہد و پیماں نہ وصل جاناں ملے تو پوچھیں

 نہ لذت عشق و عہد و پیماں نہ وصل جاناں ملے تو پوچھیں

مِری طرح سے اگر تمہیں بھی عذابِ ہجراں ملے تو پوچھیں

تم اک مسافر ہو چاندنی کے تمازتوں کی تمہیں خبر کیا

سفر میں سایہ نہ کوئی آنچل نہ ابرِ باراں ملے تو پوچھیں

ابھی تمہاری سماعتوں کو فضائیں نغمے سنا رہی ہیں

خموشیوں میں ہے زہر کیسا یہ شامِ زنداں ملے تو پوچھیں

تھکے بدن سے ہوائیں کیسے تمام خوشیاں نچوڑتی ہیں

تِرے سفینے کو آ کے ساحل پہ موجِ طوفاں ملے تو پوچھیں

محبتوں کی حکایتوں میں سرور پنہاں تھا زندگی کا

یہ جام کس نے انڈیل ڈالے وہ بزمِ یاراں ملے تو پوچھیں

معظم سعید