یہ جو پر درد زندگانی ہے

 یہ جو پُر درد زندگانی ہے 

ایک ظالم کی مہربانی ہے 

یہ جو میں شاعری میں لکھتی ہوں 

یہ مِرے درد کی کہانی ہے 

اور تو کیا بچا ہے دل میں مِرے

آپ کی یاد کی روانی ہے

حسرتوں کا گلا دبایا ہے

آگ خوابوں کو بھی لگانی ہے 

میرے اشکوں میں ضبط بہتا ہے

جس کو کہتے ہیں سب کہ پانی ہے

وائے تقدیر تجھ سے کیسا گِلہ

میری ہستی تو خود ہی فانی ہے

مجھ کو کب تک ڈرائے گی وحشت

ایک دن موت بھی تو آنی ہے

صبر کرنا تو میرا پیشہ ہے

میں نے کب دل سے ہار مانی ہے

رمل اقبال