انہی کے دم سے کئی گھروں میں دِیے جلے ہیں
یہ کچے رستے جو شاہراہوں سے جا ملے ہیں
وہ اور ہو گا جو توڑ دے گا غرور میرا
ہٹو یہاں سے تمہارے جیسے بہت پڑے ہیں
یہ گاؤں اپنی روایتوں سے جُڑا ہوا ہے
یہاں کے بچے دھنک کے رنگوں سے کھیلتے ہیں
کسی کو ان کی مثال دینے سے پہلے سوچو
یہ زندگی کے مشاہدے میں ابھی نئے ہیں
زمینی جنگوں کو فاختہ کی نظر لگی ہے
بری طرح سے جہاز کے پرخچے اڑے ہیں
کسی کی آمد پر اس طرح سے اکٹھے ہیں سب
سڑک کے دونوں طرف ہی جھنڈے لگے ہوئے ہیں
وہ کون ہے جو ہواؤں سے خوشبو لے گیا ہے
یہ کس کے جانے کا غم شجر بھی منا رہے ہیں
یہ کیا کہ سب کو دعائیں دینے کے بعد زہرا
ہمارے در سے فقیر خالی پلٹ گئے ہیں
زہرا قرار
زہرہ قرار
No comments:
Post a Comment