گھُٹی صدا کو کبھی مصلحت رہائی دے
میں چاہتا ہوں مِری چیخ بھی سنائی دے
نظر ہٹے کبھی خود سے تو کچھ نظر آئے
خدا کرے تجھے کچھ اور بھی دکھائی دے
اسی کے ہاتھوں سے اُترے گی نتھ سیاست کی
جو رونمائی سے پہلے ہی منہ دکھائی دے
لکھوں تو متن مِرا سُرخیوں سے بھر جائے
رگِ قلم کے لیے ایسی روشنائی دے
بھٹک گیا ہوں میں دنیا تلاش کرتے ہوئے
خدایا مجھ کو کبھی خود سے آشنائی دے
اس اجنبی سے کنکشن بحال کرنا ہے
اسے کہو وہ تعلق کی وائی فائی دے
اس عمر میں مجھے دلشاد چاہئے عزت
میں چاہتا نہیں بیٹا مجھے کمائی دے
دلشاد نظمی
No comments:
Post a Comment