جس کو چلنا ہے چلے رخت سفر باندھے ہوئے
ہم جہاں گشت ہیں اٹھے ہیں کمر باندھے ہوئے
یوں تو ہر گام کئی دام ہیں دشتِ شب میں
ہم بھی آئے ہیں پر و بالِ سحر باندھے ہوئے
سُوئے افلاک سفیرانِ دعا جائے ہیں
ڈر ہے لوٹ آئیں نہ زنجیرِ اثر باندھے ہوئے
اہلِ زنداں ہیں ابھی منتظرِ فصلِ بہار
شاخِ فردا سے خیالِ گلِ تر باندھے ہوئے
دشتِ امکاں میں کوئی ساتھ مِرا دے نہ سکا
کتنے رہبر ملے دستارِ خضر باندھے ہوئے
کوئی آغوش کشادہ ہے، نہ وا کوئی نظر
یعنی جو در ہے کوئی پردۂ در باندھے ہوئے
بُجھ گئی شمعِ نظر مُند گئیں شب کی آنکھیں
صبح اب آئی ہے پشتارۂ زر باندھے ہوئے
ہم تمنائی جہانِ گزراں کی رو میں
سُوئے شبنم چلے امیدِ شرر باندھے ہوئے
عزیز تمنائی
No comments:
Post a Comment