عشق در عشق اٹی شال میں زندہ رہنا
حالتِ عجز میں، ابدال میں زندہ رہنا
تم ہو آزاد تمہیں ایسی ہوا کیا معلوم
کتنا اچھا ہے کسی جال میں زندہ رہنا
سب سے دُشوار ہے کردار نِبھا کر مرنا
اس سے مشکل ہے مگر حال میں زندہ رہنا
میں نے سُوکھے ہوئے پیڑوں سے محبت کر لی
اور میں سیکھ گیا سال میں زندہ رہنا
معذرت! اے مِرے محبوب انادار ہوں میں
مجھے آتا ہے اسی چال میں زندہ رہنا
ہجر کا آخری سُر ہے مِری آواز کا نام
ہے مِرا عشق اسی تال میں زندہ رہنا
خود بخود مجھ سے تِری یاد نے رخصت لے لی
مجھ کو جب آ گیا ہر حال میں زندہ رہنا
گیسوئے یار کے گُلدان میں رہنا ہے مجھے
ہر گھڑی حُسن کی چوپال میں زندہ رہنا
حال میں رہتے ہوئے غیب کی باتیں یاسر
کارِ آسان ہے اشکال میں زندہ رہنا
یاسر عباس
No comments:
Post a Comment