التماس شکر میں دل رہ گیا

 التماسِ شکر میں دل رہ گیا​

سر پہ کچھ احسانِ قاتل رہ گیا​

رحم آیا ناتوانی پر مِری​

ذبح کرتے کرتے قاتل رہ گیا​

تم نے اک بوسہ دیا احساں کیا​

بات میری رہ گئی، دل رہ گیا

​صُلح کی اُمید پھر کل پر گئی​

سہل ہو کر کارِ مشکل رہ گیا​

تیری جلدی سے نہ بر آئی مُراد​

اے اجل دیدارِ قاتل رہ گیا​

کاوشِ صیاد نے فُرصت نہ دی​

دل میں ارمانِ عنادل رہ گیا​

جلوۂ رخسار نے ساکت کیا​

آئینہ ہو کر مقابل رہ گیا​

پھر طبیعت اپنی گھبرائی نسیم​

امتحانِ فکرِ کامل رہ گیا​

​

نسیم دہلوی