فتراک چشم یار سے باندھا ہوا ہے دل

 فتراکِ چشمِ یار سے باندھا ہوا ہے دل

گویا طنابِ دار سے باندھا ہوا ہے دل

یوں تو ہر اک خیال سے آزاد ہو گیا

لیکن خیالِ یار سے باندھا ہوا ہے دل

سب جان کر بھی کچھ نہیں کر پا رہا کہ یوں

ادراک و اضطرار سے باندھا ہوا ہے دل

منظر پہ یار ہے پسِ منظر مِرا خدا

منظر کے آر پار سے باندھا ہوا ہے دل

اس کی گلی میں وارثی دامن ہیں تار تار

دامن کے تار تار سے باندھا ہوا ہے دل

بشارت وارثی