روک مت سلسلہ چراغ جلا
ایک سے دوسرا چراغ جلا
غیبتِ شب سے لاکھ بہتر ہے
اس سے نظریں ملا چراغ جلا
تنہا بیٹھا ہے کیوں اندھیرے میں
کوئی جگنو بُلا،۔ چراغ جلا
بھول جا تلخئ شب دیروز
جو ہوا سو ہوا، چراغ جلا
خالی باتوں سے کچھ نہیں ہو گا
دل مرا مت جلا، چراغ جلا
ٹھوکریں کھا رہی ہے خلق خدا
گھر سے باہر تو آ چراغ جلا
رنگ فق ہو گیا اندھیرے کا
اُس نے جونہی سنا چراغ جلا
چھوڑ یہ فلسفے علی تاصف
کیا بقاء کیا فنا، چراغ جلا
علی تاصف
No comments:
Post a Comment