تم اُداس مت ہونا
رتجگوں کے صحرا میں خواب جب اُجڑ جائیں
تم اُداس مت ہونا
زندگی کے میلے میں ہم اگر بچھڑ جائیں
تم اداس مت ہونا
جن پر نام لکھے ہوں، ان اُجاڑ شاخوں پر
کب بہار آئی ہے
آرزو کی ٹہنی سے جب گُلاب جھڑ جائیں
تم اداس مت ہونا
جان کیا ضروری ہے، رشتے نارسائی میں
اک دُعا بھی پوری ہو
ہم اگر رواجوں کی سُولیوں پہ گڑ جائیں
تم اداس مت ہونا
وقت اک درندہ ہے اور ہم سبھی اس کی
دہشتوں کی زد میں ہیں
جب یہ بے سکوں لمحے اپنی ضد پہ اَڑ جائیں
تم اداس مت ہونا
جبر کی فضاؤں میں، مسکرا کے جی لینا
یہ بھی اک عبادت ہے
چاہے قرض کے سائے میرے قد سے بڑھ جائیں
تم اداس مت ہونا
نذیر تبسم
No comments:
Post a Comment