درد نسبتاً کم ہے آج دل کے چھالوں میں

درد نسبتاً کم ہے آج دل کے چھالوں میں

پھر بھٹک نہ جاؤں میں صبح کے اجالوں میں

زندگی کی راہوں میں یوں نہ چھوڑئیے تنہا

ہم بھی ہیں زمانے سے ساتھ چلنے والوں میں

مستقل خموشی کا کچھ تو حل نکل آتا

ہم اگر نہ کھو جاتے وقت کے سوالوں میں

آج ان کی زلفوں کی اور بڑھ گئی قیمت

رات بھی مقید ہے الجھے الجھے بالوں میں

موت اور مشکل ہو زندگی کے ماروں کی

خون دل ملا دیجے زہر کے پیالوں میں

میں تو کچھ نہیں کہتا خود ملاحظہ کیجے

کس کا نام چلتا ہے آج خوش جمالوں میں

نرم نرم لب ہیں یا پنکھڑی کنول کی ہے

بند ہے شفق ان کے پھول جیسے گالوں میں

وہ چراغ کل شب کو بجھ گیا سر محفل

جس کو ڈھونڈتے ہو تم آج کے اجالوں میں

لاکھ مجھ کو وہ بھولیں پھر بھی ہے یقیں نیر

منفرد رہوں گا میں یاد کرنے والوں میں

صلاح الدین نیر