مائیں مر کر بھی جاگتی ہیں

 افق کے پار جانے والے آنسو

سفید آنچل کے ایک کونے میں

میرے آنسو سنبھال کر اس طرح وہ بولی

نہ ایسے رونا

اے میرے بچے

یہ زندگی، نام ہے دُکھوں کا

تمہارے آنسو مِرے جگر پر ٹپک پڑے ہیں

نہ ایسے رونا

اے میرے بچے 

میں روتے روتے ہی سو گیا تھا

افق کے اس پار سے مِری ماں

مِرے دُکھوں پر اداس ہو کر

مری تسلی کو آن پہنچی

وہی مقدس، ندیم آنکھیں

رحیم آنکھیں، کریم آنکھیں

افق کے اس پار سے جو مجھ کو

بڑی محبت سے دیکھتی ہیں

مری نگاہوں سے دور

لیکن مِرے دُکھوں کی نمی سے جھلمل

وہ میرے اشکوں کو اپنے پلّو میں باندھ کر

آسماں کے اس پار لے گئی ہے

یہ لوگ کہتے ہیں؛ مائیں مرتی ہیں

مائیں مر کر بھی جاگتی ہیں

جو بچے روئیں تو سوتی کب ہیں

شہزاد نیر

برفاب