یہ کیا کہ جب قیام کیا تو سفر کھلا

 یہ کیا کہ جب قیام کیا تو سفر کُھلا

یہ کیا کہ بے گھری کُھلی مجھ پر نہ گھر کُھلا

دیکھا نہیں ہے دیکھنے والا جو پہلو تھا

منظر کی خیر ہے، تِرا زعمِ نظر کھلا

ہو رازِ ہست و نیست کہ رازِ کُن فکاں

کتنا کھلا ہو گا کسی پر، یہ اگر کھلا

جیسے ہی مجھ کو درد کی دولت ہوئی نصیب

ایسا غنی ہوا کہ معانی کا در کھلا

کتنا وفور خامشی کی گفتگو میں ہے

یہ راز مجھ پہ رات کے پچھلے پہر کھلا

تھوڑی سی دیر ہی سہی، بانٹی ہے روشنی

بجھنے کے بعد ہی سہی لیکن شرر کھلا

مسعود ساگر