تری حدود میں ہیں تیرے اختیار میں ہیں
نگاہِ دہر سے پنہاں نگاہِ یار میں ہیں
ہمارے جسم پرانے ہوئے ہیں غربت سے
ہمارے نقش بھی بکھرے ہوئے غبار میں ہیں
کہاں کی عید کہاں آرزوئے جشنِ طرب
ہم اہلِ درد محرم کے انتظار میں ہیں
بصارتوں سے جو محروم ہیں زمانے میں
اسیر ان کی حراست میں ہیں حصار میں ہیں
ہمیں نہ ڈھونڈ خیالوں کی بستیوں میں کہیں
کہ تیرہ بخت فروکش ترے دیار میں ہیں
حبیب و جون کے ہمراہ اپنے خیمے میں
حسین بیٹھے ہوئے حُر کے انتظار میں ہیں
ہمیں کسی کی ضرورت نہیں ہے جانِ اسد
اداس تیرے لیے موسمِ بہار میں ہیں
اسد اعوان
No comments:
Post a Comment