تیرے آثار مٹانے میں بہت دیر لگی
خود کو اس پار بلانے میں بہت دیر لگی
تُو میری ذات کا کھویا ہوا حصہ ہے کوئی
تُجھ کو یہ بات بتانے میں بہت دیر لگی
زندگی جس کی ہر اک تال پہ کرتی ہے دھمال
دل کے وہ تار بجانے میں بہت دیر لگی
آئینہ مجھ کو یوں دیکھے کہ سمٹتی جاؤں
تیرے رنگوں کو بہانے میں بہت دیر لگی
جس کی تعبیر میں بے شکل نکھر جاتے ہیں
مجھ کو اس کوخواب کے پانے میں بہت دیر لگی
رات پھر ہجر کے تکئے پہ کئے گیسو دراز
رات پھر خود کو سلانے میں بہت دیر لگی
کتنے بکھرے ہوئے رنگوں میں ملی ہے فرقت
مجھ کو یہ رزق اٹھانے میں بہت دیر لگی
وصل کے خواب مِری نسل ہی اب دیکھے گی
ہجر میں راستہ پانے میں بہت دیر لگی
عظمیٰ نقوی
No comments:
Post a Comment