اے حسنِ کارساز پریشاں نہ کر مجھے
عرضِ نیازِ عشق ہوں ارزاں نہ کر مجھے
رہنے دے زرد شاخ کی صورت مِرا وجود
بزمِ جہاں میں زخمِ بہاراں نہ کر مجھے
کُھل کر نہ جل سکوں گا کبھی گرد باد میں
بامِ ہوا پہ دوست فروزاں نہ کر مجھے
میں ہوں لباسِ زیست جہانِ وجود کا
دامانِ چاک تارِ گریباں نہ کر مجھے
پہلے کہاں نصیب ہے مجھ کو ذرا سکوں
اے چشمِ زیست اس قدر حیراں نہ کر مجھے
رہنے دے مجھ کو ذات کے گم کردہ شہر میں
اِس عہدِ کم نظر میں نمایاں نہ کر مجھے
مجھ کو کسی یقین کے سانچے میں ڈھال دے
پورا نہ ہو جو پیار کا امکاں نہ کر مجھے
میرے بغیر کوئی نہیں میرا آسرا
میرے وجود سے تُو گریزاں نہ کر مجھے
میں ہوں، مشامِ زیست پہ پھیلی ہوئی مہک
اے باغبانِ وقت! بیاباں نہ کر مجھے
کرچوں میں ٹوٹ کر نہ بکھر جاؤں میں کہیں
اس درجہ بھی نبیل تُو حیراں نہ کر مجھے
نبیل احمد
No comments:
Post a Comment