تم پہ نظم لکھنے سے تمہاری ہو نہیں سکتی
اگر میں تم پہ کچھ لکھتی
تمہیں میں کُل جہاں لکھتی
چمن لکھتی گھٹا لکھتی
تمہیں میں آسماں لکھتی
صبح لکھتی میں شاموں کی
تمہیں کوئی سنہرا سا سماں لکھتی
وفاؤں کا محبت کا
تمہیں میں دیوتا لکھتی
ستارہ تم کو لکھتی میں
کبھی میں ماہ لکھتی پھر
تمہی کو کہکشاں لکھتی
بھلا کے ساری دنیا کو
تمہیں میں من کا شہ لکھتی
تمہی کو چاہ میں لکھتی
تمہیں لکھتی کہ
تم بِن یہ جہاں خالی
مِرے من کا مکاں خالی
مِری ہستی ادھوری ہے
کہاں تم بِن یہ پوری ہے
میں لکھتی کہ مجھے لکھنا نہیں آتا
کہاں ہیں لفظ میرے پاس
مِرے الفاظ تھوڑے ہیں
مِرے شاہا!تمہاری شان اونچی ہے
تمہاری ذات اونچی ہے
محبت ذات کب دیکھے
بھلا اوقات کب دیکھے
میں سب کچھ ہار بیٹھی ہوں
تمہی پہ وار بیٹھی ہوں
میری اوقات ہی کیا ہے
تمہاری شان میں لکھوں
مگر حسرت ہی ہے دل میں
جو پوری ہو نہیں سکتی
میں تم پہ نظم لکھنے سے
تمہاری ہو نہیں سکتی
عالیہ شاہ
No comments:
Post a Comment