جب کبھی مدِ مقابل وہ رُخِ زیبا ہوا
آئینہ بھی رہ گیا حیرت سے منہ تکتا ہوا
فصلِ گُل میں ہے شکست و ریخت کا آئینہ دار
ایک اک تنکا نشیمن کا مِرے بکھرا ہوا
محوِ حیرت ہوں خراشِ دستِ غم کو دیکھ کر
زخم چہرے پر ہیں یا ہے آئینہ ٹوٹا ہوا؟
ابرِ غم برسے تو اشکوں کی روانی دیکھنا
ساحلِ مژگاں پہ ہے طوفاں ابھی ٹھہرا ہوا
جب میں ان سے کہہ چکا اپنی حدیثِ رنج و غم
ان کی شوخی دیکھیے کہنے لگے؛ پر کیا ہُوا
میں سمجھ پایا نہ عاجز یہ طلسمِ راہبر
ہر قدم پر منزلِ مقصود کا دھوکا ہوا
عاجز ماتوی
No comments:
Post a Comment