حُسن کی کم نہ ہوئی گرمئ بازار ہنوز
نقدِ جاں تک لیے پھرتے ہیں خریدار ہنو
طائرِ جاں قفسِ تن سے تو چُھوٹا، لیکن
دامِ گیسُو میں کسی کے ہے گرفتار ہنوز
ساتھ چھوڑا سفرِ مُلکِ عدم میں سب نے
ساتھ لپٹی ہی رہی حسرتِ دیدار، ہنوز
اپنی عیسیٰ نفسی کی بھی تو کچھ شرم کرو
چشمِ بیمار کے بیمار ہیں، بیمار ہنوز
ہم بھی تھے روزِ ازل صحبتئ بزمِ الست
بُھولتی ہی نہیں وہ لذتِ گُفتار ہنوز
کیا خراباتیوں کو حضرتِ آسی نہ ملے
کہ سلامت ہے وہی جبہ و دستار ہنوز
آسی غازیپوری
ﺁﺳﯽ ﻏﺎﺯی پوﺭﯼ
No comments:
Post a Comment