وصل کے تین مہکتے ہوئے دن
وصل
ہر اک عاشق کی اک دیرینہ خواہش
یہ مِرا عاشقوں سا دل بھی تِرے وصل کو ڈھونڈے
کوئی سے تین مہکتے ہوئے دن
وہ جس میں پہلے ہی دن تو کسی حیلے بہانے سے
مجھے ملنے کو بلائے اور مِرے خالی ہاتھوں پہ
کوئی پیارا سا تحفہ رکھ دے
وقتِ شفق ہو اور بارش کی برستی بوندوں میں
تُو میرے ساتھ چہل قدمی کرتا رہے
اور دن ختم ہو جائے
دوسرے دن میں تیرے ساتھ
تری چائے کے ٹیبل پر آ بیٹھوں
تُو مجھ کو اپنے لبوں سے لگا چائے کا کپ پیش کرے
پر اس کو پینے کی میری کبھی بھی ہمت نہ ہو
اور پھر یوں ہی باتوں باتوں میں پھر دن ختم ہو جائے
تیسرے دن میں تیرے واسطے صبح سویرے
اپنے کانپتے ہاتھوں سے ناشتہ لے کر آؤں
تُو مِرے کانپتے ہاتھوں پر ہنستے ہوئے مجھ کو تسلی دے
اور ساتھ خدا حافظ کہتے ہوئے اپنی منزل کو چل نکلے
یوں آخر کو وصل کے تین مہکتے ہوئے دن پورے ہوں
پھر چاہے ہجر کی لمبی رات کی تاریکی چھا جائے
تیرے میرے بیچ جدائی آ جائے
اویس رشید
No comments:
Post a Comment