اب تو بن سانس بھی جینے کی سزا ملتی ہے

 اب تو بِن سانس بھی جینے کی سزا ملتی ہے

کیا یہ کچھ کم ہے کہ کھانے کو ہوا ملتی ہے

دوزخی جس کو قیامت میں بھی کم دیکھیں گے

شہرِ بے داد میں وہ حد بھی روا ملتی ہے

تن یہ زخمی کہ نگاہوں کو بھی تِل دھرنے کو

رونق آباد میں مشکل ہی سے جا ملتی ہے

تم تو اپنے ہی نہ تھے ہم نے خدا بھی کھویا

موت مانگیں بھی تو اب زیست نما ملتی ہے

مانگی ہر دن شبِ فرقت نے وداعی رخصت

اور ہر رات ہی واپس مجھے آ ملتی ہے

جو ہو محروم اسے عرش سے ٹکرا کر بھی

کچھ جو ملتا ہے تو اس ہی کی ندا ملتی ہے

اور کیا من کو اب آشائوں کے جگنو دیتے

بس کہ ہر رات کو تاروں کی سبھا ملتی ہے

حشر کی بھیڑ ہے راہوں میں نہ جانے پھر کیوں

رہ نوردوں کو ہر ایک سمت خلا ملتی ہے

اصغر علی شاہ