وہ کسی طور کسی لمحہ نظر بھی آتے

 وہ کسی طور کسی لمحہ نظر بھی آتے

زندہ ہوتے تو کبھی لوٹ کے گھر بھی آتے

آسماں ہم پہ اگر نذرِ عنایت کرتا

خیر مقدم کے لیے شمس و قمر بھی آتے

جن کے کردار کی خوشبو سے مہکتی ہے فضا

ایسے مہمان کبھی تو مِرے گھر بھی آتے

میں اگر ہوتا زمیں زادوں کے لشکر میں شریک

میرے رستے میں سمندر بھی بھنور بھی آتے

میری بے لوث محبت کا تقاضہ ہے یہی

مجھ سے ملنے وہ کبھی تو مِرے گھر بھی آتے

بادشاہی سے عداوت سی رہی ہے ورنہ

کچھ علاقے تو مِرے زیر اثر بھی آتے

صبر سے تم نے اگر کام لیا ہوتا ریاض

غم کے پیڑوں پہ مسرت کے ثمر بھی آتے

ریاض حنفی